Trajneri gjerman i kuqebluve dhe futbollisti i Teutës, Rustem Hoxha, analizojnë miqësoren. Trajneri i Vllaznisë, Tomas Brdariç, është shprehur i kënaqur për paraqitjen e skuadrës së tij në miqësoren e enjtes ndaj Teutës, ku shkodranët triumfuan me rezultatin 1-0. Duke folur pas ndeshjes trajneri kuqeblu vlerësoi paraqitjen e skuadrës së tij përtej fitores
“Jemi në vazhdën e përgatitjeve për sezonin e ri, prandaj, për momentin nuk më intereson rezultati, por ndërtimi i ekipit, – tha Brdariç. – Ishte një test pozitiv. Në çdo kohë shikojmë për futbollistë të mirë. Më interesojnë gjithmonë lojtarët e mirë. Më intereson që të stërvitemi në nivel më të lartë. Këta lojtarë që kemi t’i çojmë në një nivel më të lartë.”
Për gjermanin e stolit shkodran, skuadra do të jetë gati për nisjen e kampionatit. “Për momentin askush nuk e di kur do të fillojmë kampionatin. Do vazhdojmë stërvitjen me një rritëm të lartë. Patjetër që do të jemi gati për startin e sezonit. Nuk më intereson fare çfarë ka ndodhur më përpara. Më intereson vetëm ekipi aktual. Jam 100 % i sigurt që do të jemi gati për kampionatin.”
Ndërkohë, pas ndeshjes ka folur edhe futbollisti i Teutës, Rustem Hoxha, i cili tha: “Në këto ndeshje nuk ka shumë rëndësi rezultati. Mendoj që zhvilluam një ndeshje të mirë, jo aty ku e donim, por pozitive. Grupin e kemi shumë të mirë. Afrimet e reja janë lojtarë cilësorë dhe pozitivë si njerëz. Gjithçka po shkon shumë mirë. Çdo humbje është disfatë pavarësisht ndaj kujt luan”, – përfundoi mbrojtësi durrsak.
La.Mi/Fjala.al
