Sebastian Vettel do të vazhdojë të garojë në Formula 1 por tashmë me skuadër të re. Katër herë kampioni i botës do të bashkohet me ekipin e riemëruar Aston Martin vitin e ardhshëm.
33-vjeçari shkëputi marrëdhëniet në fillim të këtij viti me ekipin e Ferrarit, të cilët vendosën të mos i ofronin një kontratë të re gjermanit. Nga ana tjetër, Aston Martin shprehet se afrimi i Vettel ishte një deklaratë e qartë e ambicies së ekipit.
“Është një aventurë e re për mua, me një kompani vërtetë legjendare makinash,” tha Vettel, i cili zëvendëson Sergio Perez.
Në deklaratën e Aston Martin thuhet se Vettel ka nënshkruar me ekipin për vitin 2021 e më tej, por nuk është konfirmuar kohëzgjatja e kontratës, ndërsa pritet që gjermani të ketë nënshkruar një marrëveshje tre-vjeçare.
“Jam jashtëzakonisht krenar të them se do të garoj me Aston Martin në 2021. Kam qenë i impresionuar me rezultatet që ekipi ka arritur këtë vit dhe besoj se e ardhmja duket edhe më e ndritshme.
Energjia dhe angazhimi i Lawrence në këtë sport është frymëzuese dhe besoj se mund të ndërtojmë diçka shumë të veçantë së bashku.”-shprehet gjermani i cili thekson se nuk i mungojnë energjitë për garat që e presin.
“Unë ende kam shumë dashuri për Formula 1 dhe motivi im i vetëm është të garoj në krye. Të arrish një gjë të tillë me Aston Martin do të jetë privilegj i madh.” -përfundon ai.
Fj.Ak./Fjala.al
