Në ditën e dytë të vizitës së saj në Shkodër, diplomatja amerikane Yuri Kim ka zhvilluar një vizitë edhe në myftininë e Shkodrës ku është pritur nga imami Muhamed Sytari.
Ky i fundit në një postim në Facebook thotë se me Ambasadoren e SHBA-së ndanë mendime rreth besimit, dijes, urtisë e historisë, kulturës e trashëgimisë, vlerave të lirisë së besimit, shenjtërisë së jetës dhe respektimit të drejtave legjitime të tjetrit, kushdo qoftë ai.
“Shkodra, me elementët e saj përbërës, besimin, qytetarinë, diversitetin fetar e kulturor, trashëgiminë e vlerave, personalitetet emblematike, datat e shënuara dhe shpirtin e harmonisë, përtej tekave provinciale, ishte pjesë e rëndësishme e bashkëbisedimit tonë” shkruan Sytari.
“U takuam dhe u ndamë në kufijtë e të bardhës, mesazheve të paqes e domosdoshmërisë së ruajtjes me dinjitet e krenari të besimit e fesë, urava që lidhin njerëzit e pjekur e vullnetmirë, dhe përkushtimit në rrugën e shërimit të lëngatave të mëdha që kanë pezmatuar shoqëritë e sotme njerëzore, atë shqiptare në veçanti” shton më tej ai.
Një ditë më parë Kim pati një takim me kryebashkiaken e Shkodrës, Voltana Ademi./Bl.Ba/Fjala.al
