Kryetarja e Byrosë Kombëtare të Hetimit, Aida Hajnaj, i bën thirrje të gjithë atyre që plotësojnë kriteret për të qënë pjesë e kësaj strukture të posaçme kundër krimit dhe korrupsionit të bëjnë aplikimin e nevojshëm.
Hajnaj thekson gjithashtu se procesi i përzgjedhjes do të jetë i drejtë, objektiv dhe transparent dhe se për të gjithë interesuarit aplikimi duhet të bëhet para datës 29 shtator 2020.
Mesazhi i Hajnajs:
Për Aplikimet për pozicionin e lirë të Hetues të Byrosë Kombëtare të Hetimit (BKH-së)
Falenderoj kanidatët që kanë aplikuar deri në datën 18.09.2020.
Do të doja të ritheksoja edhe një herë që aplikimi për Pozicionin e Lirë të Punës për “Hetuesin” e BKH-së është një mundësi shumë e mirë për t`u zgjedhur si pjesë e ekipit të ri që do të punojë ngushtësisht dhe nën drejtimin e Prokurorëve të Posaçëm për të hetuar veprat penale në fushën e korrupsionit dhe krimit të organizuar, dhe do të garantojë një strukturë të pavarur nga çdo ndikim i paligjshëm, i brendshëm apo i jashtëm.
SPAK ju bënë thirrje të gjithë kandidatëve ose kandidateve që demonstrojnë lidership, integritet, profesionalizëm dhe që plotësojnë kriteret e përcaktuara në Ligjin nr. 95/2016 “Për organizimin dhe funksionimin e institucioneve për të luftuar korrupsionin dhe krimin e organizuar” të aplikojnë për këtë pozicion pune, para datës 29 shtator 2020. Shkoni tek njoftimi për këtë pozicion të lirë pune në website-in e BKH-së dhe ndiqni udhëzimet.
Ju sigurojmë që procesi i përzgjedhjes do të jetë i drejtë, objektiv dhe transparent.
Ne duam të përzgjedhim kandidatët/et më të mirë.
Ju inkurajoj të aplikoni.
Aida Veizaj (Hajnaj)
Drejtues i Byrosë Kombëtare të Hetimit
