Slloveni fiton duelin me bashkëatdhetarin e tij, Primozh Rogliç, gara uli siparin të dielën në Paris. Slloveni Tadej Pogaraç është kurorëzuar fitues i këtij edicioni të veçantë të garës më të vjetër çiklistike në botë, Turit të Francës, që ka ulur të dielën siparin e këtij edicioni në Paris.
Supozohej të ishte dita e madhe e Primozh Rogliçit, por edhe ai vetë nuk kishte fjalë për të shpjeguar se çfarë i ndodhi të shtunën në etapën e kronometrit, teksa ai ia dorëzoi kryesimin e renditjes së përgjithshme, e bashkë me të, edhe fitoren e Turit të Francës, bashkatdhetarit të tij slloven, Tadej Pogaçarit.
30-vjeçari Rogliç ishte favoriti kryesor për trofeun e çmuar në prag të etapës së parafundit, asaj 36.2-km me kronometër, midis Lurës dhe La Planche des Belles Filles, po asgjë nuk shkoi sipas planit. Ai e nisi ditën me një epërsi prej 57-sekondash në renditjen e përgjithshme, por humbi shumë kohë kundrejt Pogaçarit dhe sidomos në ngjitjen 5.9-km me pjerrësi 8.5%. Dhe ishte bashkatdhetari i tij ai që korri një fitore historike në këtë etapë kronometrimi, duke e lënë prapa Rogliçin plot 59 sekonda, në prag të etapës së fundit, asaj që u mbajt të dielën.
Dhe që finishin e kishte në “Shomps Elize”, e cila sidoqoftë ishte një etapër simbolike dhe ku luftohet vetëm për sprintin e fundit. Humbja dramatike e Rogliçit solli në kujtesë atë të francezit Loron Finjon, i cili e humbi kurorën e Turit të Francës kundrejt amerikanit, Greg LëMond për vetëm 8 sekonda në 1989-ën, pasi e nisi etapën e kronometrit me një epërsi prej 50 sekondash.
Ndërkaq, etapa e 21-të dhe e fundit e këtij edicioni të Turit të Francës, të shtyrë për disa muaj për shkak të epidemisë së virusit korona, u fitua nga Sem Benet.
Ai mbërriti i pari në finishin e kryeqytetit francez, Paris, duke lënë prapa Mads Pedersenin, ndërsa podiumin e plotësoi sllovaku Peter Sagan.
Pesëshen e të parëve e plotësoi Kristofi dhe Viviani, ndërsa Kaleb Evani, u detyrua të kënaqej me vendin e 7-të, pas Vout van Aertit. Kësisoj, Pogaraç është kurorëzuar fitues i këtij edicioni të veçantë të garës më të vjetër çiklistike në botë.
La.Mi/Fjala.al
