Prokuroria e Posaçme Anti- korrupsion e njohur si SPAK, ka kërkuar për herë të dytë pushimin e çështjes penale ndaj tre gjyqtarëve Skënder Damini, Petrit Aliaj dhe Aleks Nikolli pasi pranuan gjykimin e shkurtuar ndaj Dajtit, duke e shpëtuar atë nga burgu përjetë.
Disa muaj më parë GJKKO rrëzoi kërkesën e SPAK për pushimin e kësaj çështjeje, por togat e zeza nuk e pranuan kërkesën duke ja kthyer pas prokurorisë duke i lënë si detyrë të kryejnë disa veprime shtesë.
Burime për “Fjala” bëjnë me dije se këto veprime janë kryer nga ana e institucionit të akuzës dhe sërish për tre gjyqtarët e vënë nën hetim, nuk janë gjetur elementë të veprës penale. Ata u hetuan pas dyshimeve për korrupsion, por akuzat nuk u provuan.
Dritan Dajti i akuzuar për vrasjen e 4 policëve në vitin 2009 i shpëtoi burgimit të përjetshëm kur pikërisht ish Gjykata e Apelit për Krime të Rënda me këtë trupë gjykuese pranoi gjykimin e shkurtuar dhe e dënoi atë me 25 vite burg.
Prej 10 vitesh çështjet gjyqësore ndaj Dritan Dajtit ishin shtyrë vazhdimisht ndërsa Gjykata e Shkallës së Parë, e dënoi atë me burgim të përjetshëm për vrasjen e efektivëve të policisë Fato Xhani, Sajmir Duçkollari, Altin Dizdari dhe Kastriot Feskaj gjatë një operacioni për kapjen e tij. Kujtojmë se në atë kohë u vra edhe Ledio Mara, ndërsa u plagos dhe vetë Dritan Dajti./Bl.Ba/Fjala.al
