Deputetja Rudina Hajdari pas mbledhjes së Këshillit Politik, tha se nuk do të tërhiqen asnjë centimetër pas. Sipas saj, drafti i Partisë Socialiste nuk mundëson hapjen e listave.
Ajo kërkoi edhe nga deputetët e tjerë të opozitës parlamentare që të bojkotojnë çdo takim, për sa kohë Partia Socialiste nuk tërhiqet.
“Reforma Zgjedhore siç po e shikoni ka filluar të bjerë dhe të futet në grackën që ka rënë gjithmonë. Partitë politike po e përdorin reformën për të fuqizuar veten dhe jo qytetarin dhe kjo është e trishtë.
Thirrja jonë vazhdon të jetë e njëjtë që qytetarët duhet të kenë të drejtën e tyre kushtetuese. Është e trishtë që PS këmbëngul me një draft hileqar që devijon hapjen e listave 100%. Nuk mund ta devijojmë dot këtë debat kaq të rëndësishëm që kërkon të negociojmë me sovranitetin e popullit, sepse sovraniteti i popullit duhet të jetë në parlamentin e ardhshëm.
Nuk ka centimetër pas. I ftoj kolegët e opozitës që të refuzojmë të shkojmë në çdo mbledhje dhe seancë derisa të shqyrtohet drafti jonë. Beteja e tyre është për një pushtet personal kurse e jona për një të ardhshme më të mirë për vendin”, tha ajo./Bl.Ba/Fjala.al
