Në ditën botërore të mësuesve, Autoriteti për Informim mbi Dokumentet e ish-Sigurimit të Shtetit 1944-1991, ka bërë publike dosjen e Gjeto Vocit.
Dosja e Hetuesisë së tij mban shifrën 12049/1. Sipas kësaj dosjeje, thuhet se “Gjeto Dod Voci, i akuzuar për agjitacion e propagandë kundër pushtetit popullor, në bazë të nenit 55 të Kodit Penal, është arrestuar në 15.10.1979”.
Në një shkresë të saj të datës 18 mars 1980, Ministria e Punëve të Brendshme, Dega e Punëve të Brendshme, Sektori i Hetuesisë Shkodër, urdhëron:
“Mbi të arrestuarin Gjeto Voci.
Nga ana jonë është dërguar për gjykim i pandehuri Gjeto Voci për krimin e agjitacionit dhe propagandës kundër shtetit. Kemi mendimin që për interesa shtetërore, gjykimi i kësaj çështjeje të bëhet me dyer të mbyllura.
Shefi i seksionit të hetuesisë/ Qemal Meta”
Ndërkohë që Prokuroria e rrethit Shkodër i dërgon një shkresë gjykatës së po këtij rrethi ku thuhet: “Bashkëngjitur për gjykim po ju dërgojmë dosjen hetimore kundër të pandehurit Gjeto Voci”.
Dhe kështu bëhet publik rasti i një mësuesi i cili është dënuar në vitin 1980 për agjitacion e propagandë kundër pushtetit popullor. Sipas nenit famëkeq 55 të Kodit Penal shqiptar, “propagandë dhe agjitacion quhet tentativa për të përmbysur, ose minuar pushtetin e popullit”. Ishte vepër e dënueshme me të paktën 6 muaj burg dhe deri në dënim me vdekje, në periudhat e luftës ose të trazirave.
Neni 55 është konsideruar si një shkelje e rëndë e lirisë së fjalës. Ai ishte një ndër instrumentet kryesore ligjore për ndjekjen penale të disidentëve shqiptarë që u kthye në një mekanizëm të urryeshëm të Sigurimit. /Ra.My.Fjala.al/
