Ministrja Elisa Spiropali foli në lidhje me ndryshimet në Kodin Zgjedhor duke thënë se mazhoranca e ka konsumuar të gjithë kohën e saj për një marrëveshje me opozitën.
Gjatë një interviste në emisionin “Opinion”, e pyetur nëse mazhoranca do të rishihte ndryshimet në kod në frymën e një kompromisi me opozitën, pas kthimit të tyre në Kuvend nga Presidenti, deputetja Spiropali tha:
“Ne i kemi dhënë të gjitha shanset, e kemi konsumuar të gjithë kohën, kemi treguar durim të pafundëm për sa i takon kompromisit edhe me opozitën që zgjodhi të djegë mandatetet. Nuk është hera e parë që Presidenti kthen symbyllurazi ligje dhe kode dhe ndryshime. Presidenti e ka quajtur ilegjitim kuvendin e Shqipërisë që njihet nga partnerët e BE, nga partnerët amerikanë dhe vazhdon funksionimin normal duke shprehur sovranitetin e popullit. Ajo që nuk po ndodh është që presidenti të përfaqësojë unitetin e popullit”, u shpreh Spiropali.
Pa.Va/Fjala.al
