Kultivimi i kanabisit në zonat malore është një ndër fenomenet më shqetësuese për shoqërinë tonë, pasi sjell mjaft konflikte mes kultivuesve, konflikte të cilat shoqërohen edhe viktima, sikundër është edhe ekzekutimi i dy të rinjve Vison Çutaj dhe Klement Pepaj.
Dy të rinjtë u ekzekutuan nga kushëriri i tyre, pasi ata e kanë dhunuar atë meqë e akuzonin se u kishte vjedhur një sasi prej 50 kg kanabisi. Gazeta “Fjala”, në numrin e sotëm, publikon në mënyrë të përmbledhur këtë ngjarje të rëndë, duke renditur 15 fakte që çuan në ekzekutimin e dy të rinjve.
- Klement Pepaj, Vilson Çutaj, dhe Danjel Pepaj humbën kontaktet me familjet e tyre pasditen e 3 tetorit.
- Pasditen e së shtunës, vëllai i njërit prej viktimave, Oslon Çutaj, bëri kallëzim se prej orës 15:00 kishte humbur çdo kontakt me vëllain e tij, Vilson Çutaj, dhe dy kushërinjtë Klement Pepaj dhe Danjel Pepaj.
- Policia dhe Prokuroria e Shkodrës ngritën menjëherë një grup hetimor për zbardhjen e kësaj ngjarjeje, ku nga dëshmitë e marra nga vëllai i njërit prej të zhdukurve dhe banorëve të fshatit u ngritën dyshime se dy nga tre të zhdukurit mund të ishin ekzekutuar.
- Vjedhja e një sasie prej 50 kg kanabis dyshohet se është bërë shkak që të rinjtë të jenë konfliktuar mes tyre.
- Klement Pepaj dhe Vilson Çutaj dhunuan e rrahën Danjel Pepajn, pasi e akuzonin se ai u kishte vjedhur kanabis nga parcela që ata kishin mbjellë.
- Pas dhunës që këta persona ushtruan ndaj 25-vjeçarit, ai pranoi se ishte personi që u kishte vjedhur hashashin dhe u premtoi se do t’ua kthente.
- Danjel Pepaj u ka kërkuar Klement Pepajt dhe Vilson Çutajt takim për t’u sqaruar dhe për t’u dorëzuar mallin e vjedhur.
- Dy të rinjtë kanë shkuar në takim. Ata janë dërguar në malin Krastë nga vëllai i Vilson Çutajt, Olsoni, i cili i ka pritur në një lokal në zonë, disa kilometra larg vendit ku të rinjtë kishin lënë takim.
- Pas takimit me kushërinjtë, Danjel Pepaj i ka qëlluar me breshëri kallashnikovi dy të afërmit e tij, duke i lënë të vdekur në vend.
- Pas katër ditë kërkimesh trupat e dy të rinjve u gjetën pasditen e djeshme, të mbuluar me shkurre, në një nga malet e Kastratit, në Malësi të Madhe, pranë fshatit Virth.
- Ata u gjendën 250 m larg një parcele kanabisi, parcelë e cila dyshohet se është mbjellë nga dy viktimat.
- Policia e asgjësoi parcelën me djegie.
- Autori i dyshuar i vrasjes së dyfishtë, pasi kreu krimin, mendohet se ka kaluar kufirin ilegalisht dhe fshihet në Mal të Zi.
- Prokuroria dhe Policia e Shkodrës e kanë shpallur në kërkim ndërkombëtar Danjel Pepajn, si autor të dyshuar të vrasjes së dyfishtë.
- Forca të shumta të FNSH-së blindojnë fshatin Virth, pasi i tremben përplasjes mes familjeve Pepaj dhe Çutaj, ngaqë ato banojnë pranë njëra-tjetrës. /Ra.My.Fjala.al/
