Ka patur pak minuta në dispozicion, por e pati rastin e tij dhe nuk e fsheh zhgënjimin me fatin e kuq që e përndoqi në ndeshjen e së dielës. Taulant Seferi u aktivizua nga stoli në minutën e 82-të në sfidën ndaj Kazakistanit.
Sulmuesi pati një rast të artë në fundin e takimit, për t’i dhuruar 3 pikë kuqezinjve, por i vetëm përballë portierit, u ndal nga gardiani i portës kazak.
Në konferencën për shtyp të ditës së hënë, të mbajtur në prag të sfidës ndaj Lituanisë, Seferi vlerësoi cilësitë e grupit kuqezi, duke u shprehur edhe gatishmërinë e tij sa herë thirret në ngjyrat kuqezi.
“Çdo herë është kënaqësi kur je i ftuar me Kombëtaren e madhe të Shqipërisë, – ka thënë ai. – Çdo herë ndihem i lumtur dhe krenar që vij këtu. Mezi po prisja që të futesha në fushë dhe mendoj që në ato minuta bëra mirë.
“Nuk kisha fat te rasti për gol, – ka vijuar futbollisti që është pjesë e Jang Bojs të Bernës, por që, për momentin, luan i huazuar tek Ksamaksi në Superligën zvicerane. – Shpresoj të vazhdoj kështu duke punuar fortë dhe duke qenë pjesë e Kombëtares.
Punoj fort për të kapur formacionin. Është dëshira e çdo lojtari për të qenë titullar, por në fund vendos trajneri se kush do luajë dhe kush do rri në stol.”
“Çdo herë do jem i gatshëm për Kombëtaren. Unë kam shumë besim te grupi i ri. Kemi 1 javë së bashku, atmosfera është shumë e mirë. Ka shumë kualitet në këtë skuadër. Do të japim maksimumin dhe shpresoj të dalim të parët në grup. Kemi skuadër me shumë kualitet, shpresoj që në fund të arrijmë objektivat tona”, – përfundoi futbollisti i Kombëtares kuqezi, Taulant Seferi.
la.mi/Fjala.al
