Një person i shpallur në kërkim për katër vepra penale të martën është arrestuar në Tiranë.
Burime nga policia thanë se në pranga ra shtetasi Feruzan Shehu, 32-vjeç, i cili me 19 qershor të këtij viti kërcënoi një biznesmen në Fushë Bulqizë për t’i marrë një shumë parash.
32-vjeçari i vuri biznesmenit Gëzim Balla një gjobë 10 mijë Euro, por në momentin e dorëzimit të parave e kuptoi se i ishte ngritur kurth nga policia dhe u largua duke qëlluar në ajër.
Gjykata e Rrethit Gjyqësor Dibër ka caktuar masën e sigurisë “Arrest me burg” për katër vepra penale; si “Vrasja me paramendim” e mbetur në tentativë, e kryer në bashkëpunim, “Armëmbajtje pa leje”, “Shtrëngim në anë të kanosjes apo dhunës për dhënien e pasurisë” dhe “Prishja e rendit dhe qetësisë publike”.
Mësohet se veprimet e mëtejshme do të kryhen nga Drejtoria Vendore e Policisë Dibër./Re.D/Fjala.al
