Pritja që nuk po ka fund për nisjen e sezonit të ri të Kampionatit Kombëtar të Futbollit, e diktuar nga bojkoti i Ligës Profesioniste të Futbollit, ka bërë që skuadrat, sidomos ato të dy niveleve më të larta, Kategorisë Superiore dhe asaj Të Parë, dhe drejtuesit e tyre të jenë të detyruar të kërkojnë kundërshtarë për miqësore në mesjavë dhe fundjavë, në mënyrë që ekipi të mos humbë formën.
Kështu, 18-herë “kampionia e Shqipërisë, Dinamo, ka arritur një marrëveshje me drejtuesit e Vllaznisë për të zhvilluar një miqësore midis tyre, që do të zhvillohet në kryeqytet ditën e mërkurë. Në fakt, shkodranët kanë probleme me lojtarët e prekur nga “Covid-19” ditët e fundit, por drejtuesit e Dinamos nuk e shohin si pengesë, përderisa këta lojtarë janë izoluar.
Blutë kanë zgjedhur një kundërshtar nga elita këtë herë për të parë gjendjen në prag të kampionatit. Më parë janë ndeshur me Partizanin, Skënderbeun dhe Tiranën, ndërsa dy miqësoret e fundit i kanë fituar ndaj Vorës dhe Orikut. Ndërkaq, Vllaznia ka zhvilluar një numër të madh ndeshjesh miqësore, duke nisur që nga 20 gushti 2020, me një shpeshtësi prej një ndeshjeje çdo 5-6 ditë.
la.mi/Fjala.al
