Kreu i Partisë Republikane, Fatmir Mediu deklaroi se ai i ka kërkuar kryedemokratit Lulzim Basha që t’u tregojë shqiptarëve se çfarë ofron opozita.
Gjatë takimit me strukturat e PR në Shkodër, Mediu theksoi ndër të tjera se çdo dualizëm në koalicion do të ishte në dëm të shqiptarëve dhe vetë opozitës
“Unë jam në takim me strukturat e PR. Do diskutojmë për ato që do bëjë partia jonë. Duhen përfshirë energji të reja dhe njerëz të rinj. Brenda kësaj PR do përcaktojë edhe kandidaturat e veta edhe marrëdhëniet me koalicionet opozitar. Të gjithë duan të dinë se ku qëndron opozita shqiptare. Ka nevojë për një platformë bashkë-qeverisëse. Variantet elektorale janë të gjitha të hapura për faktin se mendoj se ne duhet të maksimalizojmë votën duke përfshirë edhe të majtën edhe të djathtën. Ne do të shikojmë atë që është më racionale dhe më e mira për të fituar zgjedhjet.
Unë jam i qartë me zotin Basha por dua të jem i qartë me veten time. Qytetarët kanë një pyetje se çfarë ofron opozita. Kemi një detyrë që t’i japim të djathtës shqiptare atë formë dhe atë marrëdhënie me qytetarët që e djathta të qeverisë. Sa më e fortë të jetë PD, aq më i fortë është koalicioni. Çdo lloj marrëdhënie që do krijonte dualizëm në koalicion, do krijonte problem në qëndrimin e PD, do ishte në dëm të shqiptarëve dhe vetë opozitës”, tha Mediu.
Kjo nuk është hera e parë që kreu i Partisë Republikane i kërkon llogari hapur kreut të opozitës se çfarë do të ndodhë me koalicionet. Edhe më herët ai dhe aleatë të tjerë të Bashës si Dashamir Shehi apo Agron Duka kanë kërkuar nga kreu i PD që ai të jetë më i qartë me koalicionet.
Pa.Va/Fjala.al
