Policia e Shtetit zbuloi se sot janë gjobitur 341 persona që nuk respektuan rregullin për mbajtjen e maskës.
Gjithashtu, theksohet se janë shoqëruar në Komisariat 11 qytetarë që nuk kanë pranuar të tregojnë mjetin e identifikimit në mënyrë që polici të plotësonte fletën e gjobitjes.
“Gjatë kontrolleve janë konstatuar edhe qytetarë që nuk i kishin vendosur maskat dhe për këto raste, shërbimet e Policisë në të gjithë vendin kanë vendosur 341 masa administrative me vlerën 3.000 lekë secila. Gjithashtu, shërbimet e Policisë kanë shoqëruar në ambientet e Policisë në të gjithë vendin, 11 shtetas që nuk i janë bindur urdhrit të punonjësit të Policisë për të treguar dokumentin e identifikimit, me të cilin punonjësi i Policisë duhet të plotësonte fletën e gjobës për shkeljen e konstatuar.
Policia e Shtetit nisur edhe nga shtimi i rasteve të personave të infektuar, por edhe për të monitoruar sa më mirë zbatimin e masës më të fundit për vendosjen e detyrueshme të maskës, ka rritur prezenën e shërbimeve të Policisë me uniformë dhe të punonjësve të Policisë Kriminale në territor, të cilët vijojnë patrullimet dhe kontrollet në të gjithë vendin.”, thuhet ndër të tjera në njoftim.
Sot ishte dita e dytë që detyrimi për mbajtjen e maskës edhe në ambientet e jashtme, ka hyrë në fuqi. Kujtojmë se ditën e djeshme Policia njoftoi se u gjobitën 171 qytetarë.
