Një person i shpallur në kërkim për vrasje është arrestuar sot në Fier. Bëhet me dije se në pranga ka rënë Skënder Krasniqi 43-vjeç.
Strukturat për Hetimin e Krimeve në DVP Fier, pas një pune operative dhe hetimore intensive, kanë bërë të mundur dokumentimin ligjor të ngjarjes së ndodhur në datën 22.11.2015, në Fier, ku është vrarë me mjete të forta prerëse shtetasi Novrus Likometa, 82 vjeç, banues në Fier.
Pas rifillimit të çështjes penale, në bashkëpunim dhe koordinim me Prokurorinë Fier u arrit sigurimi i provave ligjore dhe paraqitja e tyre në Gjykatë.
Nga specialistët për Hetimin e Krimeve të Rënda në DVP Fier u bë ekzekutimi i vendimit të Gjykatës së Rrethit Gjyqësor Fier, e cila ka vendosur masën “Arrest në burg” për shtetasin Skënder Krasniqi 43 vjeç, banues në Fier, për veprën penale “Vrasja me paramendim”.
Materialet i kaluan Prokurorisë pranë Gjykatës së Shkallës së Parë Fier, për veprime të mëtejshme procedurale.
Ngjarja
Kujtojmë se 82 vjeçari pasi u masakrua për vdekje trupi ju hodh në kazanin e plehrave. Gjatë asaj kohe nga dëshmia e marrë nga Skënder Krasniqi në rolin e të dyshuarit tha se Novruz Likometaj i ngacmonte seksualisht nënën dhe kjo u bë shkak që ai ta vriste në gjaknxehtësi.
I moshuari mësohet se kërkonte të martohej përsëri, pasi nuk kishte grua. Kufoma e Novruz Likometajt u gjet në një kazan mbeturinash 300 metra larg shtëpisë, i mbështjellë me çarçaf.
Likometaj, ish-kryetar i sindikatës së transportit, kishte në pronësi me djemtë një agjenci turistike udhëtimi, “Likometa Travel”, të linjës Shqipëri-Greqi.
Pas ekspertizës mjeko-ligjore rezultoi se trupi i viktimës ishte masakruar nga goditje me thikë dhe goditja vdekjeprurëse ishte bërë në fyt.
Trupi u gjet nga dy persona që mblidhnin kanaçe i mbështjellë me një çarçaf. Viktima ishte baba i katër fëmijëve./Bl.Ba/Fjala.al
