Një person u arrestua nga policia pas tmerrit që krijoi në një lagje të Mallakastrës, teksa lëvizte me kallashnikov dhe qëllonte në ajër. Denoncimin e bënë banorë të lagjes të frikësuar nga ajo që dëgjonin.
Shërbimet e Komisariatit të Policisë Mallakastër, pas marrjes së njoftimit se në lagjen “5 Shkurti” ka pasur të shtëna me armë zjarri, ka ndërhyrë në mënyrë të menjëhershme dhe si rezultat është bërë e mundur kapja dhe arrestimi në flagrancë i shtetasit D. K., 63 vjeç.
Ky shtetas qarkullonte me armë zjarri në lagje dhe qëllonte në ajër duke shkaktuar panik e frikë te banorët. Kur ka parë shërbimet e Policisë, ai ka tentuar të hedhë armën dhe të largohet, por është kapur dhe prangosur nga policia, të cilët i kanë sekuestruar edhe armën e zjarrit kallashnikov.
Gjatë kontrollit të banesës së 63-vjeçarit, shërbimet e policisë gjetën dhe sekuestruan në cilësinë e provës materiale 1245 fishekë, tre krehra, një ndezës mekanik, granatë ofensive, një shkop gome, një thikë me teh të gjatë, një dorezë hekuri, një dorezë me sferë hekuri goditëse, barut për armë gjahu, një radio si ato të Policisë dhe 485 kg duhan i grirë, pa dokument blerjeje.
Po në vijim të kontrollit të territorit, bazuar dhe në informacionet e marra në rrugë operative, shërbimet e Komisariatit të Policisë Divjakë kanë ushtruar kontroll në fshatin Tërbuf, Divjakë, ku kanë kapur dhe arrestuar në flagrancë shtetasin J. Rr., 25 vjeç.
Gjatë kontrollit, shërbimet e Policisë Divjakë i kanë gjetur dhe sekuestruar në cilësinë e provës materiale 1 armë zjarri pistoletë, 1 pushkë, 2 krehra dhe 38 fishekë.
Materialet procedurale do t’i kalojnë Prokurorisë, për veprime të mëtejshme procedurale./Bl.Ba/Fjala.al
