“Taksë për të hyrë në kryeqytet” është ideja e kreut të komunës së Prishtinës, Shpend Ahmeti, por që ka ngjalluar shumë reagime dhe veçanërisht tek disa parti politike në Kosovë.
Lëvizja Vetëvendosje dhe Partia Demokratike kanë dalë menjëherë kundër, me argumentin se një taksë e tillë është diskriminuese.
Dy partitë politike argumentojnë se edhe sikur kreu i komunës ta ketë seriozisht, ajo s’do votohet në kuvendin komunal dhe për rrjedhojë një ide e tillë do të mbesë veçse në letër.
“Kuvendi komunal e ka votuar rregulloren për parkingjet ku përcaktohen edhe çmimet. Por kryetari nuk mund të vendosë taksë, këtë nuk mund ta bëjë vetë pa e sjellë në kuvendin komunal. Por edhe nëse e sjell, nuk besoj që do t’i votohet. Do të jetë njëjtë sikur me propozimin që e ka sjellë para një viti për t’u vënë ekstra çmim qytetarëve që vijnë nga komunat e tjera për t’u kontrolluar te mjeku. Kemi konstatuar se është shkelje e të drejtave të njeriut dhe nuk e kemi votuar, njëjtë do të veprojmë edhe me këtë tani, sepse nuk mund të bësh diskriminim,” ka deklaruar Gashi, përfaqësues i Lidhjes Demokratike.
Ndërkohë, pas kritikave të shumta ndaj deklaratave të tij për bërjen me pagesë të hyrjes me makina në kryeqytet, Shpend Ahmeti ka shkruar në Facebook se kjo do të bëhet për të evituar trafikun dhe për të mbrojtur qytetarët nga ndotja e ajrit.
“Meqenëse rrugët janë të ngushta dhe nuk mund të zgjerohen në qendër, atëherë zgjidhja e vetme mbeten ndërtimi i rrugëve alternative (unaza) dhe pagesa e taksës për lëvizje me makinë në pjesë të populluara të qytetit ku ka trafik dhe që mund të shkaktojnë ndotje,” ka shkruar Ahmeti.
Sipas tij, në një mënyrë të ngjashme, vepron edhe Londra.
“Pra, përveç parkingut me pagesë, ne kemi shqyrtuar edhe mundësinë e taksës për lëvizje me makinë në qendër. Në gjuhën angleze njihet si Congestion Charge (taksë e trafikut në njëfarë mënyre). Londra është kryeqyteti që e ka rregullu më së miri këtë sistem,” thotë Ahmeti./Re.D/Fjala.al
