Presidenti i Kosovës, Hashim Thaçi në ditën e themelimit të OKB-së, ka thënë se Kosova më shumë se çdo vend tjetër në botë e kupton rolin dhe rëndësinë, që kjo organizatë ka pasur në krijimin e paqes dhe stabilitetit në rajonin e Ballkanit Perëndimor.
Me një shënim në faqen zyrtare në “Facebook”, kreu i shtetit të Kosovës shkruan se roli i misionit të OKB-së ka qenë tejet i rëndësishëm në Kosovë, si në demokratizimin, ashtu edhe në ndërtimin e institucioneve, të cilat më vonë e shpallën edhe pavarësinë.
Ai thekson se tashmë ka ardhur koha që Kosova të bëhet anëtare e plotë e kësaj organizate.
“Ne i jemi mirënjohës OKB-së për punën e madhe që po bënë për promovimin e paqes, sigurisë dhe stabilitetit në Kosovë dhe gjithandej botës. Ndërsa, tani është koha që Kosova të bëhet anëtare e plotë e kësaj organizate”, ka shkruar ai./Re.D/Fjala.al
