Ndonëse BE i tha të presë opininion e Komisionit të Venecias, Kuvendi i Shqipërisë nuk ka humbur kohë për të votuar ndryshimet në Kodin Zgjedhor pas kthimit në Kuvend nga Presidenti i Republikës.
Kodi Zgjedhor është futur në diskutimet e rendit të ditës së sotme të Komisionit për Çështjet Ligjore, Administratën Publike dhe të Drejtat e Njeriut, në orën 12:00.
Mazhoranca nuk pritet të bëjë asnjë ndryshim në Kodin Zgjedhor, duke e kaluar menjëherë për votim në seancën plenare të radhës.
Më herët komisionerit europian Oliver Vahelyi i kërkoi kryeministrit Rama që të priste vendimin e Komisionit të Venecias për të miratuar ndryshimet, një thirrje që u refuzua nga kreu i qeverisë.
Presidenti Ilir Meta ktheu të premten që shkoi për rishqyrtim ndryshimet në Kodin Zgjedhor që erdhën pas ndryshimit të Kushtetutës më 30 korrik.
Heqja e formulës ekzistuese të koalicioneve, vendosja e pragut kombëtar 3% dhe hapja e listave ishin tri ndryshime që u bënë pa konsensusin e opozitës politike në fillim, por që më pas edhe deputetët e opozitës së re, pasi kuptuan se çfarë po ndodhte me Kodin, u pozicionuan kundër.
Por megjithatë mazhoranca e miratoi në Parlament me 94 vota, 10 më tepër sesa numri minimal i votave që duhen në Parlament për të bërë ndryshime në Kod./Bl.Ba/Fjala.al
