Sekretari i Përgjithshëm i Partisë Demokratike, Gazment Bardhi të enjten ka reaguar në lidhje me rivotimin urgjent të ndryshimeve të Kodit Zgjedhor në Kuvend.
Bardhi theksoi se Shqipëria sot është më pak demokratike, teksa e krahasoi kryeministrin Rama me presidentin bjellorus, Aleksandër Lukashenko.
“Shqipëria sot është më pak demokratike dhe më pak europiane. Qeveria e Edi Ramës është identifikuar në Bruksel dhe kryeqytetet kryesore europiane si një qeveri që punon kundër integrimit europian dhe kundër interesit të qytetarëve. Me refuzimin që i bëri thirrjeve të përsëritura të BE-së, Rama nuk ndryshon nga Lukashenko”, tha Bardhi.
Bardhi deklaroi se Rama për pushtetin e tij personal është gati t’i vërë zjarrin Shqipërisë, t’i ndëshkojë shqiptarët, duke penguar me dashje hapjen e anëtarësimit të vendit në BE.
“Injorimi i thirrjes së BE për opinionin e Komisionit të Venecias, e izolon tërësisht Shqipërinë dhe e fut në hartën e vendeve që janë në kurs përplasje me Europën. Kjo është përgjegjësi e një njeriu që pushtetin e tij personal e vendos mbi interesin e Shqipërisë dhe shqiptarëve”, tha Bardhi.
Kujtojmë se Kuvendi i Shqipërisë të enjten rrëzoi dekretin e presidentit Ilir Meta për Kodin Zgjedhor me 96 vota kundër, ashtu siç ishte paralajmëruar edhe më herët./Re.D/Fjala.al
