Më pak se një javë na ndajnë nga zgjedhjet presidenciale në Shtetet e Bashkuara të Amerikës dhe keqinformimi në lidhje me votimin, rregullat dhe sigurinë e votimit po përhapet me shpejtësi në internet.
Newsguard, një platformë që merret me analizimin e besueshmërisë së mediave dhe faqeve të informacionit, ka përmbledhur në një studim lajmet kryesore që mashtrojnë mbi zgjedhjet presidenciale në SHBA, të cilat janë botuar në mbi 6 mijë faqe interneti.
Një nga mashtrimet kryesore është lajmi se votimi me postë rrit mundësinë e manipulimit zgjedhor.
Studimi i Newsguard identifikoi 40 profile në Facebook, të cilat u konsideruaran si faqet që përhapnin më shumë informacione të rreme mbi metodat e votimit dhe që kishin mbi 100 mijë ndjekës secila.
Katër nga 40 faqet menaxhohen jashtë Shteteve të Bashkuara, veçanërisht në vende si Meksika, Vietnami dhe Izraeli.
Pavarësisht përpjekjeve të Facebook për të parandaluar përhapjen e lajmeve të rreme, faqe të tilla vazhdojnë të jenë në gjendje të postojnë informacione të pavërteta rreth votës dhe procesit zgjedhor dhe krejt në kundërshtim me politikat e paracaktuara nga rrjeti social.
“Lajme të reja dhe false publikohen çdo ditë, me informacione të pasakta dhe me tendencën për të mashtruar qytetarët”, denoncoi stafi i Newsguard./Re.D/Fjala.al
