Legjenda e gjallë e kinematografisë italiane, Sophia Loren, shumë shpejt do të shfaqet në Netflix. Filmi “La Vita davanti a se” (Jeta përballë saj) është realizuar nga djali i aktores, Edoardo Ponti, dhe do të ketë premierën në Netflix, më 13 nëntor.
Kjo është e para herë që aktorja 86-vjeçare shfaqet në Netflix, por e treta herë që bashkëpunon me të birin.
Loren do të luajë rolin e një ish-prostitute hebraike që krijon miqësi të veçantë me një djalë nga Senegali.
“Jeta përballë saj”, me regji të Edoardo Ponti-t dhe protagoniste Sophia Loren, ka në qendër historinë e një gruaje të moshuar hebreje, ish-prostitutë, e mbijetuar e Aushvicit, e cila ndërton një marrëdhënie të veçantë me një fëmijë nga Senegali.
Kur Edoardo i propozoi rolin e Madame Rosës, ikona e kinematografisë nuk mundi t’i thotë jo.
“Jeta përballë saj” është një libër që e njoh shumë mirë dhe personazhi më tërhoqi shumë, duke më bërë të rikthehesha në kohën kur hodha hapat e parë në kinematografi. Është një histori që ia vlen të rrëfehet”,- tha Sophia duke shtuar se drama në të cilën ajo bën pjesë është një mesazh i fortë tolerance, faljeje dhe dashurie.
“Të gjithë kemi të drejtën të na shohin e të na dëgjojnë, sepse ndryshe jeta bëhet e pamundur”./Bl.Ba/Fjala.al
