Kryetarja e LSI, Monika Kryemadhi ka folur mbi spekulimet se Klevis Balliu do të kandidojë për deputet në radhët e PS zgjedhjet e ardhshme.
E ftuar në Report Tv ajo nuk dha një përgjigje të prerë mbi këto diskutime, por u shpreh se vlerësimin e Balliut i takon ta bëjë PD dhe Lulzim Basha.
Ajo shtoi se fakti që mund të jesh tepër aktiv në fushatë nuk do të thotë se do të jesh i përfshirë në listat e deutetëve.
“Në fakt unë Klevisin e njoh që fëmijë. Klevisi është anëtar i PD-së, nuk është anëtar i LSI-së dhe këtu nuk është problemi që ne t’i bëjmë karshillëk njëri tjetrit. Unë jam e bindur që vlerësimin e Partisë Demokratike të Klevis Balliut nuk ka ngelur që t’ia bëjmë ne, por t’ia bëjë vetë kryetari i saj dhe PD-ja. Unë nuk mendoj se të qënurit në listat e deputetëve është po themi gjë e domosdoshme. Ajo që është shumë e rëndësishme është që listat e LSI-së, do të jenë lista të cilat do të vijnë pas një lloj procesi, jo vetëm të përfshirjes së anëtarësisë, por edhe të opinionit publik, edhe të leximit të kandidatëve të mundshëm që mund të ketë LSI-ja në qarqe të mundshme.
Ne kemi përzgjedhur koordinatorë politikë, të cilët janë jo vetëm koordinatorë politikë për përgatitjen e axhendës elektorale, por edhe për ngritjen e grupeve të punës gjatë fushatave elektorale, të cilët jo vetëm marrin angazhimin e tyre nëpër struktura, por edhe një angazhim të gjithë përfshirjes së gjithë elementëve që i duhen një partie politike në fushatë elektorale. Sepse mund të jesh simpatizant, por nuk do të jesh anëtar i partisë. Mund të jesh militant që punon në fushatë dhe je mjaft aktiv, por nuk do të jesh i përfshirë në listat e deputetëve.”, u shpreh Kryemadhi.
Pasi anëtarësia e PD zgjodhi që Balliu të mos ishte pjesë e listave për deputet në Partinë Demokratike, mediat filluan të aludojnë se ish-deputeti i PD do të kandidojnë në radhët e LSI.
Pa.Va/Fjala.al
