Turqia vazhdon që të ketë probleme ekonomike dhe kjo i “ka ngrënë kokën” guvernatorit të Bankës Qendrore, Murat Uysal.
Presidenti turk Rexhep Erdogan vendosi që ta shkarkojë atë nga detyra pas lira turke ra në nivel rekord, me 30 për qind që nga fillimi i këtij viti.
Një dollar amerikan u këmbye me 8.54 lira të premten pasi arriti rekordin e vlerës më të ulët, 8.58, pavarësisht dobësimit të dollarit në kohën kur po vazhdon numërimi i votave në zgjedhjet presidenciale të Shteteve të Bashkuara.
Guvernatoi i shkarkuar, kishte marrë këtë detyrë në korrik të vitit të kaluar, kur Erdogani e kishte shkarkuar paraardhësin e Uysalit, Murat Cetinkaya, për shkak të zemërimit të presidentit që Banka Qendrore nuk e kishte ulur shkallën e interesit për ta nxitur rritjen ekonomike.
Erdogan gjithnjë e ka bërë të qartë se e kundërshton shkallën e lartë të interesit dhe vazhdimisht ka bërë thirrje për kosto më të ulët të huave.
Erdogan thotë se vendi është në luftë ekonomike dhe se ndodhet në mes të trekëndëshit të djallit të shkallës së interesit dhe këmbimit si dhe inflacionit.
Por nëse Banka Qendrore nuk cakton politika më të rrepta të valutës, sipas Capital Economics, Turqia është në rrezik që të përballet me një krizë të plotë të valutës, si ajo e vitit 2018./Re.D/Fjala.al
