Në 8 nëntor bota regjistroi rastin e pesëdhjetë miliontë të Covid-19. Rreth 1.26 milionë viktima mendohet se janë shkaktuar nga virusi, megjithatë shifra e vërtetë mund të jetë dy ose tre herë më e lartë.
Pas një vere pak a shumë të ekuilibruar me rastet, vdekjet në Europë po rriten me shpejtësi. Vetëm gjatë javës së kaluar, kontinenti regjistroi 4,000 raste ditore fatale. Matanë Atlantikut, situata është gjithashtu duke u përkeqësuar, ku spitalet në SHBA po mbushen dhe vdekjet po shtohen.
Një situatë e kundërt paraqitet në hemisferën jugore, ku pandemia është ngadalësuar disi. Në Amerikën e Jugut, vdekjet kanë rënë me 60% që nga kulmi i tyre në fillim të shtatorit. Australia nuk ka regjistruar asnjë vdekje nga Covid-19 prej 27 tetorit.
Duket se Covid-19 po ndjek ndryshimin e stinëve. Sëmundja shpërtheu për herë të parë në Kinë, dhe qendra u zhvendos me shpejtësi në perëndim drejt Italisë deri në fund të shkurtit. Pasi virusi u përhap në Amerikë në mars, epiqendra e virusit u përqëndrua përtej Atlantikut, përpara se të tërhiqej në jug në maj ndërsa shpërthimet u shfaqën në Amerikën Qendrore dhe Jugore. Që nga ekuinoksi i shtatorit, pandemia është zhvendosur në veri-lindje drejt Europës edhe një herë.
Lidhja mes Covid-19 dhe motit mbetet e diskutueshme. Mendohet se moti mund të ndikojë në transmetimin e virusit në dy mënyra. Së pari, ndikon në kushtet në të cilin virusi mbijeton dhe qëndron në ajër.
Së dyti, njerëzit kalojnë më shumë kohë brenda, ku është më e lehtë përhapja e Covid-19. Viruse të tjerë si gripi apo ftohja e zakonshme, arrijnë kulmin gjatë dimrit, gjë që sugjeron se të njëjtën gjë mund të ndjekë dhe koronavirusi.
Disa studime kanë treguar se transmetimi duket të bjerë ndërsa rritet temperatura dhe lagështia. Por raport i ri në Revistën Ndërkombëtare të Kërkimit Mjedisor dhe Shëndetit Publik sugjeron që efekti është mesatar.
Pas kontrollit për një sërë faktorësh si lëvizjet dhe dendësia e popullsisë, studiuesit zbuluan se vetëm temperatura e ajrit kishte vetëm një efekt shumë të kufizuar në përhapjen e covid-19 në të gjithë botën. Dhe ai efekt i vogël duket se lind për shkak të ndikimit të motit në sjelljen e njerëzve, sesa në vetë virusin. /The Economist
