Shkarkimi i Emanuel Egbosë nga detyra e trajnerit të Tiranës ka marrë edhe vëmendjen e rrjetit prestigjioz britanik, BBC, që, në seksion e vet të Afrikës, i ka kushtuar një shkrim të posaçëm ish-portierit të përfaqësueses nigeriane.
Duke kujtuar se ai ishte i pari trajner afrikan që e shpalli një skuadër “kampion” dhe e çoi atë në turet eliminatore të Ligës së Kampioneve, shkrimi veçon faktin se Egboja u shkarkua pas vetëm 4 ndeshjesh në këtë fillimsezoni, ndërsa i referohet edhe komunikatës për shtyp të klubit të Tiranës, që shpjegonte se vendimi për shkarkim erdhi “pas rezultateteve të dobëta në ndeshjet e fundit.
I cituar nga BBC-ja, trajneri nigerian i bardhebluve ka zgjedhur të mbetet mirënjohës pavarësisht shkarkimit.
“Nuk kam asnjë keqardhje apo zhgënjim, sepse kam dhënë maksimumin, ashtu siç ka bërë edhe skuadra dhe i jam mirënjohës Zotit për atë që kemi arritur së bashku, – ka deklaruar 47-vjeçari, duke folur për median në fjalë.
Duke falenderuar tifozët për mbështetjen e jashtëzakonshme dhe të pandërprerë, por edhe futbollistët, veçanërisht për sezonin e shkuar, ku Tirana u shpall “kampione”, ish-trajneri i Tiranës nuk ka ngurruar të shënjestrojë tërthorazi, edhe drejtuesit e klubit, teksa thotë: “Unë e di që është e pamundur të fshish historinë që ne kemi krijuar.”
“Për mua, si nigerian, si afrikan, të fitoja një titull në Evropë, e për më tepër, duke e çuar skuadrën drejt pjesëmarrjes në dy veprimtaritë madhore kontinentale, e gjitha kjo nuk mund të fshihet. Unë e di që kam përpara ditë edhe më të mëdha. Më mirë, ngandonjëherë nuk mjafton dhe besoj që më e mira ende nuk ka ardhur për mua”, – thotë ndër të tjera Emanuel Egbo, ndërsa shkrimi i rrjetit prestigjioz britanik, BBC, sjell edhe një historik të karrierës dhe arritjeve të tij si lojtar dhe trajner.
Pa.Va/Fjala.al
