Asambleja e Përgjithshme e Zakonshme Zgjedhore e Federatës Shqiptare të Peshëngritjes, që u mbajt në shtunën në Tiranë dhe që dështoi, duke i hapur kështu rrugën një Asambleje tjetër të Përgjithshme të Jashtëzakonshme Zgjedhore e cila do të mbahet muajin e ardhshëm,ka marrë edhe vëmendjen e medieve ndërkombëtare dhe ka qenë faqja e madhe sportive, “insidethegames.biz”, që i ka kushtuar një shkrim të gjatë ngjarjes së fundjavës, por edhe gjithë sfondit historik që çoi në atë që u shpalos në mjediset e Hotel “Tirana International”.
Shkrimi i gazetarit të mirënjohur, Brian Oliver, bën kronologjinë e ngjarjeve të Asamblesë, duke e vënë theksin tek përpjekja e ish-presidentit të dorëhequr, Elez Gjoza, për t’u rikthyer në postin e lënë para afro 3 vjetësh, por edhe përpjekjet e tij dhe të atyre që e mbështesnin, për të hyrë me forcë brenda sallës ku po mbahej Asambleja.
Shkrimi veçonte dhe faktin që peshëngritja kishte shansin historik të zgjidhte një presidente femër, Eglantina Çuni Kalemin, por ajo nuk u la as të fliste gjatë punimeve të zhurmshme të Asamblesë.
Sidoqoftë, ajo ka përsëritur se do të rikandidojë edhe në Asamblenë e 14 dhjetorit, ndërsa artikulli i faqes së njohur theksonte faktin se, përtej deklaratës së tërheqjes “për arsye personale, presidenti Theodhor Masllavica dukej se ishte kërcënuar nga persona me pushtet, duke çuar në vendimin e tij të pakthyeshëm.
Ajo që është fakt është se gjatë drejtimin të tij, peshëngritja fitoi plot 37 medalje në arenën ndërkombëtare dje të gjitha të çliruara nga njolla e dopingut që pati shoqëruar shtangën kuqezi nën drejtimin 6-vjeçar të Gjozës.
l.m/Fjala.al
