Alexey Navalny, lideri i opozitës në Rusi është shprehur se Europa duhet të sanksionojë rrethin e ngushtë të Vladimir Putin. Navalny i ka quajtur ata bandë kriminelash të mbushur me pushtet.
Ai u theksoi se ndalimi i të drejtës për të udhëtuar ose ngrirja e aseteve ndaj zyrtarëve të lartë nuk do të merren seriozisht për sa kohë që nuk sanksionohen oligarkët më të pasur.
Si pjesë të oligarkëve përmendi Aleshei Usmanov, një miliarder me aksione në biznese të fuqishme, si shtëpia botuese Kommersant apo rrjeti telefonik MegaFon.
Duke folur në Komisionin e Punëve të Jashtme të Parlamentit Europian ditën e premte, Navalny tha se ishte jashtëzakonisht e rëndësishme që populli rus të dinte se Europa në tërësi dhe Parlamenti Europian nuk do të heshtin për ngjarje të tilla, duke nënkuptuar helmimin e tij.
“Unë padyshim nuk jam i pari dhe për fat të keq nuk do të jem i fundit që helmohet ose vritet ose trajtohet në këtë mënyrë“.
Kreu i opozitës ruse gjithashtu tha se zgjedhjet e vitit të ardhshëm në parlamentin kombëtar të vendit, Duma, do të ishin një moment kritik.
Ai tha se trillimi dhe falsifikimi i rezultateve ishte “i pashmangshëm” dhe se fokusi duhet të përqendrohet në sigurimin e çdo kandidati të gatshëm që do të marrë pjesë në zgjedhje.
I pyetur nga eurodeputetët nëse ai e ndjente se mund të vepronte i sigurt nga jashtë vendit, Navalny tha se planifikonte të kthehej së shpejti në Rusi.
“Plani im aktual është rimëkëmbja dhe pastaj kthehem në Rusi për të vepruar nga brenda, kështu që as nuk po përpiqem të krijoj mënyra për të vepruar nga jashtë“, tha ai. /Re.D/Fjala.al
