Lucien Favre largohet pas humbjes 1-5 të shtunën në shtëpi përballë Shtutgartit. Borusia e Dortmundit ka shkarkuar trajnerin e saj, Lusien Favre, pas humbje 1-5 që skuadra pësoi të shtunën në fushën e vet përballë Shtutgartit. Kjo ishte fitorja e humbja e 4-t e Dortmundit në këto 11 javë dhe ajo mbetet 5 pikë pas kryesueses së Bundesligës dhe rivales bavareze, Bajernit të Mynihut.
Favre, i cili mori drejtimin e skuadrës gjermane në korrik të 2018-ës, kur u largua nga klubi francez i Nisës, e udhëhoqi skuadrën drejt turit të 16-shes së këtij sezonit të Ligës së Kampioneve, duke u kualifikuar si fituese e grupit. Ndihmëstrajneri Edin Terziç do ta drejtojë Dortmundin deri në fund të sezonit dhe do ta drejtojë skuadrën për herë të parë të martën, në ndeshjen e radhës në Bundesliga përballë Verder Bremenit.
Edin Terziç ka shërbyer më parë si ndihmës i Sllaven Biliçit tek Uest Hemi dhe tek përfaqësuesja e Kroacisë. Drejtori sportiv i Dortmundit, Mikael Zork, deklaroi se vendimi i bordit të klubit ishte “unanim”, për shkak të rrezikut të madh që i paraqitej misionit të arritjes së objektivave këtë sezon.
Ndërsa kreu ekzekutiv i Borusias së Dortmundit, Hans-Joakim Vatzke tha se “klubi i është mirënjohës Lucien Favres për punën e jashtëzakonshme që ka bërë gjatë dy viteve e gjysmë në drejtim, duke e udhëhequr skuadrën dy herë drejt titullit “nënkampion””.
“Si profesionist dhe si njeri Lucien Favre ishte i paqortueshëm”, – shtoi ai. Vetë Favre, kontrata e të cilit me Borusian mbyllej në fund të këtij sezoni, e cilësoi “një katastrofë” humbjen me Shtutgartin e saporikthyer në Bundesligë. “Nuk bëmë asgjë mirë, ngado që ta shohësh”, – deklaroi zvicerani 63-vjeçar pas ndeshjes.
Lucien Favre, i cili më parë ka drejtuar edhe Herthën e Berlinit dhe Borusian e Mënshengladbahut në Bundesligës, dhe ndihmësi i tij, Manfred Stefes, u njohën me vendimin e klubit për shkarkimin e tyre pas humbjes së të shtunës.
Interesant është fakti se Borusia e Dortmundit, e cila u rendit e dyta sezonin e shkuar, ka fituar vetëm njërën nga 5 ndeshjet e fundit në Bundesligën gjermane, por ka humbur 6 nga 8 ndeshjet e luajtura në shtëpi pa tifozë. Me tifozët në tribuna, skuadra kishte humbur vetëm një nga 32 e ndeshjet e fundit nën drejtimin e Lucien Favresë.
l.m/Fjala.al
