Presidenti Ilir Meta ka reaguar për të dhënat që tregojnë shtim të kultivimit të kanabisit në vend. Kreu i shtetit ka publikuar raportin e Zërit të Amerikës, ndërsa thotë se nuk ishte surprizë.
Ai akuzon qeverinë duke u shprehur se shtimi i kultivimit të kanabisit me afrimin e zgjedhjeve është kthyer në traditë, ndërsa shton se ky është një “koncesion” për grupet kriminale.
Më tej, Meta paralajmëron se “askush të mos mendojë, lëre më të guxojë, që me paratë e kanabisit, të deformojë vullnetin e shqiptarëve në 25 prill 2021 dhe të pengojë të ardhmen europiane të shqiptarëve”.
Reagimi i plotë:
Asnjë surprizë! Shtimi i kultivimit të kanabisit, me afrimin e zgjedhjeve, është kthyer tashmë në traditë.
Është një “koncension” për grupet kriminale, që në këmbim të përfitimeve kolosale nga kanabisi, u kërkohet nga ortakët në pushtet “kontrolli elektoral” i Qarqeve.
Që prej publikimit të raportit të fundit vjetor të Qendrës Europiane të Drogave, i kam bërë thirrje Policisë së Shtetit, Shërbimit Informativ Shtetëror, Prokurorisë dhe agjencive ligjzbatuese të përqëndrohen seriozisht në luftën kundër këtij fenomeni kanceroz, që aq shumë e ka dëmtuar shoqërinë tonë dhe imazhin ndërkombëtar të Shqipërisë.
Lufta kundër drogës është kusht për integrimin europian.
Askush të mos mendojë, lëre më të guxojë, që me paratë e kanabisit, të deformojë vullnetin e shqiptarëve në 25 prill 2021 dhe të pengojë të ardhmen europiane të shqiptarëve.
Grupet kriminale dhe ortakët e tyre në pushtet janë të identifikuar!
