Policia e Tiranës ka arrestuar një person të shpallur në kërkim, në kuadër të operacionit “Transferta”. Në pranga ka rënë shtetasi Sh.B., 29 vjeç, pasi ka rezultuar se ishte i përfshirë në veprimtarinë kriminale në fushën e krimeve kompjuterike.
Ky është personi i 10 i arrestuar, pasi pesë muaj më parë u vunë në pranga 9 pjesëtarët e tjerë të grupit, që ndërhynin në llogaritë e Facebook.
Policia thotë se ky shtetas, në bashkëpunim me shtetasit e tjerë të arrestuar, për një periudhë 1-vjeçare, ka ndërhyrë në llogari të ndryshme të rrjetit social facebook, duke ndryshuar të dhënat e tyre dhe më pas i kanë përdorur për të komunikuar me miq të këtyre llogarive.
Me anë të mashtrimit, ata kanë kërkuar shuma të ndryshme monetare dhe si rezultat kanë përfituar shumën 38.000 euro.
Polica bën me dije se vijon puna për identifikimin dhe arrestimin e personave të tjerë të përfshirë në këtë aktivitet të kundërligjshëm./Bl.Ba/Fjala.al
