Ljuis Hemilton do të synojë titullin e 8-të botëror në Formula 1, sërish me “Mercedes”-in. Shumë shpejt do të vijë edhe lajmi për rinovimin e kontratës së pilotit britanik me skuadrën gjermane. Pas garës së Abu Dhabit, kampioni i botës kishte thënë se do të vendoste për rinovimin, përpara Krishtlindjes, e duket se gjithçka po shkon në drejtimin e duhur.
Skuadra gjermane ka publikuar një ditë më parë, një fjali të pilotit kur shkruan se: “Dua të jem këtu edhe vitin e ardhshëm.” Shoqëruar nga fjala “Shpejt” dhe gjestin e dorës tek hedh firmën. Me “Mercedes”-in, Hemiltoni ka fituar 6 tituj, nga këta, 4 radhazi dhe vetëm një me “MekLaren”-in në 2008-ën. Me skuadrën gjermane në 2021-shin, ai do të synojë titullin e 8-të botëror, për të thyer rekordin e Mikael Shumakerit.
Dhe të bëhet kështu piloti me më shumë tituj botërorë të fituar në historinë e Formulës 1. “Synimi im është të qëndroj këtu edhe vitin e ardhshëm. Mendoj se si skuadër mund të bëjmë akoma shumë, si në sport edhe jashtë tij”. Këto janë fjalët e pilotit 35-vjeçar, që shuan kështu zërat për një largim të mundshëm nga “Mercedes”-i apo një tërheqje nga Formula 1.
Pa.Va/Fjala.al
