Gjykata e Posaçme ka lënë në fuqi masat e sigurisë të dhëna në mungesë për 23 të arrestuarit për kultivim dhe trafikim narkotikësh. Mësohet se gjykata ka lënë në qeli 16 persona, katër “arrest në shtëpie” dhe tre “detyrim paraqitje”.
23 persona u arrestuan dje gjatë një mega-operacioni për kultivimin e lëndëve narkotike në zonën e Skraparit.
SPAK tha se në aktivitetin kriminal janë të përfshirë policë dhe funksionarë publikë, nga shefi i Policisë Poliçan, Neritan Naska, tek administratori i Njësisë Administrative Tërpan, Edmond Zotko apo kryeplaku i Çorrogjafit, Fatos Lamaj. Për shefin e Poliçanit, GJKKO ka dhënë masën “arrest shtëpie”.
Sipas, SPAK janë administruar prova nga të cilat ka rezultuar se një grup personash, të cilët vepronin në zonën e Skraparit, kanë kryer veprat penale të “Kultivimi i bimëve narkotike”, “Prodhimi dhe shitja e narkotikeve”, kryer në formën e posaçme, atë të “Grupi i strukturuar kriminal”, si dhe veprën penale “Pastrimi i produkteve të veprës penale apo veprimtarisë kriminale”./Bl.Ba/Fjala.al
