Për momentin është vetëm një hipotezë, por a nuk nis gjithçka kështu? Lojërat Olimpike të Tokios edhe mund të anulohen. Për herë të parë një ministër i qeverisë Japoneze pranon këtë mundësi. Shtimi i numrit të të infektuarve me virusin korona dhe shpallja e gjendjes së jashtëzakonshme në 11 qytete të Japonisë shton rrezikun e anulimit të Olimpiadës së këtij viti.
Një ministër i kabinetit japonez, pranoi gjatë mbledhjes së të premtes se “gjithçka mund të ndodhë” me Lojërat Olimpike të Tokios të shtyra nga viti i shkuar në këtë vit për shkak të virusit “Covid-19”. Ai bëhet kështu zyrtari i parë i lartë që pranon pasigurinë në lidhje me Lojërat, ndërsa Japonia dhe vendet e tjera vazhdojnë të luftojnë me virusin dhe numrin e rasteve në rritje të të infektuarve.
Taro Kono, Ministër për Reformën administrative dhe Rregullatore, nuk përjashtoi mundësinë që Lojërat Olimpike të anuloheshin, me Tokion dhe rajone të tjera, aktualisht në gjendje të jashtëzakonshme, të paktën deri më 7 shkurt 2021. Ai është ministri i parë i kabinetit që devijon nga këmbëngulja e Kryeministrit Joshihide Suga se Japonia është në rrugën e duhur për të mbajtur Lojëra “të sigurta”.
Kjo, pavarsisht se një gjendje e jashtëzakonshme u zgjerua këtë javë, duke përfshirë rreth 11 rajone. “Duke patur parasysh situatën e virusit korona, gjithçka mund të ndodhë, – tha Kono, në një konferencë shtypi. – Për këtë arsye, Komiteti Organizator dhe Komiteti Olimpik Ndërkombëtar (IOC), natyrisht duhet të mendojnë për planet rezervë.”
“Megjithëse qeveria jonë po përgatitet me vendosmëri për Lojërat Olimpike dhe Paraolimpike”, – ka shtuar zyrtari japonez. Presidenti i “Tokio 2020”, Joshiro Mori, tha në një fjalim, para pak ditësh, se një shtyrje tjetër ishte “absolutisht e pamundur”. Mori gjithashtu tha se Japonia do të vendosë në muajt e ardhshëm nëse do të lejojë tifozët e huaj të jenë të pranishëm në Lojërat Olimpike
“Tokio 2020”, në udhëkryq të vendimit për mbajtjen e saj, Ministri japonez ngre pikëpyetje
