Ambasadorja e SHBA-së në Shqipëri, Yuri Kim, ka bërë një tjetër paralajmërim për të gjithë ata që ndoshta besojnë se Reforma në Drejtësi apo lufta ndaj korrupsionit është vetëm një fluskë bosh.
Përmes një shënimi në facebook, Kim thotë se nuk bën premtime të mëdha, por garanton se SHBA e kanë seriozisht Reformën në Drejtësi apo luftën ndaj korrupsionit në Shqipëri.
“Ju e dini, unë nuk bëj premtime të mëdha. Gjithçka mund t’ju them është se Shtetet e Bashkuara e kanë shumë seriozisht reformën në drejtësi, se e kemi shumë seriozisht korrupsionin, se e kemi shumë seriozisht ndërtimin e një marrëdhënieje me Shqipërinë, e cila është e fortë në demokraci, mbrojtje, dhe biznes. Dhe j’ua lë juve në dorë të gjykoni, bazuar në fakte, se sa përparim është bërë apo nuk është bërë. E kam thënë këtë edhe më parë, uroj që njerëzit të mos shpërqëndrohen nga propaganda dhe ekzagjerimet. Njerëzit duhet të bazohen në fakte”.
