Shoferi i një urbani të linjës së Kombinatit mori dje gjithë vëmendjen e mediave pasi e ktheu autobusin në mes të rrugës, duke kapërcyer dhe trafikndarësen. Pamjet u regjistruan nga kalimtar të rastit dhe u publikuan në rrjetet sociale.
Kjo manovër në rrugë i ka kushtuar shtrenjtë shoferit të urbanit pasi policia e ka identifikuar dhe i ka pezulluar patentën.
“Nisur nga pamjet e publikuara në disa media sociale, ku shfaqet një autobus i një linje të transportit publik qytetas duke kapërcyer trafikndarësin në një nga rrugët kryesore urbane të kryeqytetit, Policia Rrugore e Tiranës ka bërë të mundur identifikimin e autobusit dhe të drejtuesit të tij.
Pas kryerjes së verifikimeve të nevojshme, Policia Rrugore ka proceduar me pezullimin të lejes së drejtimit, drejtuesin e autobusit, shtetasin S. N., për shkeljen e parashikuar në nenin 174 të Kodit Rrugor të Republikës së Shqipërisë “Kthimi i sensit të lëvizjes dhe kapërcimi i trafikndarësit, edhe aty ku ai mungon, si dhe kalimi në karrexhatë ose pjesë të saj në sens lëvizjeje të kundërt me atë të lejuar”, njofton Policia.
