29 hamera ushtarakë do i shtohen Forcave të Armatosura të Shqipërisë si një dhuratë nga SHBA. Përmes një njoftimi në rrjete sociale, Ambasada Amerikane njofton se mjetet e blinduara mbërritën ditën e sotme në portin e Durrësit.
“Njëzet e nëntë Automjete Shumë-Përdorimshme me Lëvizshmëri të Lartë (Humvee) mbërritën sot në Portin e Durrësit. Këto automjete janë dhurim për Forcat e Armatosura të Shqipërisë nga Ushtria e Shteteve të Bashkuara të Amerikës dhe do të ndihmojnë në rritjen e gatishmërisë ushtarake shqiptare dhe ndërveprimit të saj me NATO-n” – shkruan Ambasada Amerikane.
Ndërkohë në 26 prill në vendin tonë do të fillojë një stërvitje ushtarake nën udhëheqjen e ushtrisë amerikane ku do të marrin pjesë mijëra ushtarë të vendeve anëtare të NATO-s.
Trupat do të zbarkojnë në Shqipëri në 25 prill ku ndër të tjera do jenë dhe 10 anije, 18 avionë, 19 helikopterë, 6 sisteme raketash patriot dhe 1000 automjete joluftarake.
