Forcat RENEA kanë zbarkuar sot në Laç, në kuadër të operacionit për arrestimin e autorit të vrasjes së Shkëlzen Kastratit.
Shkëlzen Kastrati, 42-vjeç u ekzekutua me armë zjarri paraditen e 1 shkurtit në Fier. Ngjarja e rëndë ndodhi rreth orës 10:30, në vendin e quajtur “Ura e Sheqit”, ku një person ende i paidentifikuar qëlloi ndaj tij me armë zjarri duke e lënë të vdekur në vend.
Autori u largua nga vendngjarja me një automjet tip “Range Rover”, i cili u gjet nga shërbimet i djegur te vendi i quajtur “Mbikalimi i Baltzës”.
Vrasja e Shkëlzen Kastratit mendohet të jetë vazhdim i vrasjes së ndodhur në shkurt të vitit 2016 te zona e quajtur Mulliri i Artë. Shkëlzen Kastrati është vëllai i shënjestrës së vrasjes së 5 viteve më parë por që u shpëtoi plumbave. Klement Kastrati, i cili shpëtoi, ndërkohë që i vrarë mbeti një shtetas nga Patosi. 42 vjeçari Shkëlzen Kastrati është baba i 4 fëmijëve dhe nuk ishte i njohur për policinë.
/Fjala.al
