Luhen dy të parat e javës së 24-t të Superiores, Bylis shtang Vllazninë me përmbysje, fiton 2-1 në Shkodër, Kukësi, vetëm 1-1 me Apoloninë. Vllaznia është ndalur në Shkodër, duke u mundur 1-2 të premten përballë Bylisit dhe duke rrezikuar seriozisht vendin e parë. Sipas raporteve paraprake, kjo humbje i ka kushtuar stolin edhe trajnerit Tomas Brdariç, i cili shkarkuar. Ndërkaq, edhe Kukësi nuk ka shkuar dot më larg se një barazim 1-1 në Stadiumin “Elbasan Arena” përballë Apolonisë, ndërsa 3 ndeshjet e tjera luhen të shtunën.
Kategoria Superiore e Kampionatit Kombëtar të Futbollit ka luajtur të premten pasdreke dy ndeshjet e para të javës së 24-t, duke dhuruar dy rezultate të papritura. Kështu, Vllaznia është ndalur në Shkodër, duke u mundur 1-2 përballë Bylisit dhe duke rrezikuar seriozisht vendin e parë në pritje të 3 ndeshjeve të tjera të së shtunës. Shkodranët e mbyllën pjesën e parë në epërsi minimale, me një gol të Dilaverit. Por miqtë nga Ballshi përmbysën gjithçka në të dytën, duke barazuar shifrat me një gol të Spahiut.
Duke vijuar më pas të sigurojnë fitoren me një 11-metërsh të diskutueshëm në minutën e dytë shtesë, të shndërruar në gol nga Antoni Bexhi. Ndërkaq, edhe Kukësi nuk ka shkuar dot më larg se një barazim 1-1 në Stadiumin “Elbasan Arena” përballë Apolonisë. Ndonëse ka mbetur me 10 lojtarë në minutën e 42-të, pas daljes me karton të kuq të Bytyçit, verilindorët do ta mbyllin pjesën e parë në epërsi.
Kjo, falë 11-metërshit të saktë të Ibraimit në minutat shtesë. Por 5 minuta para fundit, Apolonia gjen golin e barazimit me anë të Gjatës, duke marrë një pikë të vyer. 3 takimet e tjera të javës së 24-t luhen të shtunën dhe spikat derbi i kryeqytetit midis Tiranës dhe Partizanit, që luhet në Stadiumin “Selman Stërmasi”, duke nisur nga ora 13:00, ndërsa në të njëjtën kohë luhet në Korçë përballja Skënderbeu-Laçi.
Takimi i fundit është ai që nis në Durrës në ora 16:00, midis Teutës dhe Kastriotit.
