Ana Tafili, nga Durrësi, është kthyer në një frymëzim për shumë njerëz, pasi ndonëse se ka katër vite që lufton me sëmundjen e kancerit, nuk e humbur buzëqeshjen dhe shpresën.
Ajo ka kryer 2 operacione dhe 36 kimioterapi, por me shumë energji, ajo realizon plot video në TikTok, duke treguar shpirtin e saj luftarak.
Në një lidhje me Skype për “Ftesë në 5”, ajo tregoi se ka 30 vite që jeton në Itali dhe se lajmin se ishte me kancer e mori në ditën e ditëlindjes së të birit.
“Do niseshim për pushime, por kisha një parandjenjë dhe nuk po bëja dot gati valixhen, bëra një ekografi dhe aty më doli që unë kisha kancer. Ishte tre korrik dhe ishte ditëlindja e djalit tim. Në darkë kishim organizuar një festë surprizë për tim bir. Vendosëm që festën ta bënim, pas festës i tregova djalit që unë kam kancer dhe për momentin nuk më kishin dhënë asnjë shpresë, katër vite më parë kur u diagnostikova. Djali im, që kishte humbur edhe të atin, i cili vdiq nga një aksident në punë, u revoltua dhe tha se Zoti nuk mund të ma marrë edhe mamin”, tha ajo.
