Prokuroria Speciale (SPAK) i kërkoi Gjykatës së Lartë rihapjen e çështjes ndaj ish-Ministrit të Mbrojtjes Fatmir Mediu. Nga shpërthimi i repartit të demontimit të muncioneve në Gërdec, humbën jetën 26 persona. Lëvizjet në sistemin e drejtësisë erdhën pas ankimimeve të vazhdueshme nga Zamira Durda, e cila humbi djalin 6-vjeçar nga ngjarja e rëndë.
Nga Fernada Cenko
Shpërthimi i Gërdecit që ndodhi më 15 Mars 2008, që mori 26 jetë, mbi 300 të plagosur dhe qindra banesa të shkatërruara rihapet sërish, ku kreu aktual i PR-së Fatmir Media do të merret nën hetim. Pas më shumë se 13 viteve, drejtësia ka nisur të lëvizë. Kanë qenë vetë familjarët e viktimave të cilët e dërguan çështjen në SPAK. Ky i fundit i ka bërë kërkesë Gjykatës së Lartë që të rihapë hetimet për ish-ministrin e mbrojtjes Fatmir Mediu. Familja Durdaj është një prej familjeve që nuk e ka lënë të zvarritet si çështje por herë pas here ka ngritur zërin dhe ju ka kërkuar institucioneve për zbardhjen e çështjes. Nëna e një prej 26 viktimave, Zamira Durda, e cila humbi djalin 6 vjeç në këtë shpërthim ka bërë vazhdimisht thirrje që të ketë drejtësi deri në fund. Teksa endej dyerve të gjykatave pasi ishte e zhgënjyer për sistemin e drejtësisë, Zamira Durda shprehej se nuk mund të gëlltisë sorollatjen e institucioneve. Ajo do të dijë arsyen se përse nuk jeton djali i saj, në atë kohë 6 vjeç. “Nuk mund ta duroj një gjë të tillë. Qëndrimi i gjykatës është i tmerrshëm dhe kjo nuk mund të durohet. Haram i qoftë buka që ha dhe paga që merr. Do ta ndjek çështjen edhe në Gjykatën e Lartë, pavarësisht se nuk kam shpresë. Nuk dua dëmshpërblim, dua drejtësi, dua të di pse nuk jeton më djali im”. Ndërsa pushimin e çështjes e cilësoi si korrupsion. Nga analizimi i pretendimeve në kërkesën për rihapjen e hetimeve, rezulton se ekzistojnë të gjitha shkaqet ligjore për revokimin e vendimit të pushimit të çështjes penale ndaj Mediut dhe të rihapen hetimet ndaj tij për kryerjen e veprës penale “Shpërdorimi i detyrës” kryer në bashkëpunim.
Prokuroria e Posaçme vlerëson se ndjekja penale për çështjen penale ndaj shtetasit Fatmir Mediu nuk ka asnjë pengesë që të vazhdojë duke sqaruar se pengesa e autorizimit për procedim ka qenë e përkohshme në momentin kur është vendosur pushimi i çështjes, ndërsa tani kjo pengesë nuk ekziston. Në njoftimin zyrtar thuhet se Prokuroria e Posaçme ka paraqitur në Gjykatën e Lartë kërkesë për revokimin e vendimit të pushimit të çështjes penale ndaj Fatmir Mediut, e pushuar me vendimin nr.6, datë 14.09.2009 të Kolegjit Penal të Gjykatës së Lartë dhe vijimin e proçesit gjyqësor ndaj tij, i akuzuar për veprat penale të parashikuara nga nenet 248 e 25 të Kodit Penal dhe nenet 70/2 e 2 të Kodit Penal Ushtarak. “Nga analizimi i pretendimeve të parashtruara në kërkesën e mësipërme, nga rezultatet e veprimeve verifikuese të kryera lidhur me faktet e pretenduara, si dhe nga shqyrtimi i dokumentacionit të administruar, është arritur në përfundimin se ekzistojnë të gjitha shkaqet ligjore për revokimin e vendimit të pushimit të çështjes penale ndaj shtetasit Fatmir Mediu, e pushuar me vendimin nr.6, datë 14.09.2009 të Kolegjit Penal të Gjykatës së Lartë”, thuhet në njoftimin e Prokurorisë së Posaçme. Para zgjedhjeve të 25 prillit, Geraldo Durda, i cili humbi të vëllanë në tragjedinë e Gërdecit tha se drejtësia është e vonuar dhe se ish funksionarët e shtetit që duhet të mbanin përgjegjësi ishin pjesë e listës për zgjedhjet e 25 prillit. Sipas tij, Fatmir Mediu ish ministri i mbrojtjes që ka firmën e tij në atë që ndodhi në Gërdec, nuk duhet të jetë listën e kandidatëve për deputetë. Mediu renditej në vendin e 7-të në listën e koalicionit PD-AN për qarkun e Tiranës.
