Antuan Grizman është i paprekshëm te Franca, ose më saktësisht, është bërë i tillë që pasi i ka shënuar Shqipërisë. Një ndeshje në Euro 2016, ajo ndaj përfaqësueses shqiptare, ishte ajo e cila i dha rrugë një serie mbresëlënëse për sulmuesin francez, i cili ka luajtur sot shifrën e pabesueshme të 50 ndeshjeve radhazi me fanellën e “gjelave”.
Didier Deshamp i besoi Grizman që në fillimin e rrugëtimit të tij në këtë përfaqësuese, por në Euro 2016 erdhi momenti kur e bëri atë personazhin kryesor të manovrës sulmuese. Kjo tregohet nga fakti se Grizman ka luajtur të 50 ndeshjet e fundit në të cilat ka qenë i grumbulluar për Francën. Ndër këto ndeshje, 47 të fundit kanë qenë si titullar, gjë që tregon më së miri besimin që ka Deshamp te ai.
Hera e fundit kur Grizman nuk ishte titullar me këtë përfaqësuese ndodhi në qershorin e vitit 2016, kur në Marsejë, Franca u përball me Shqipërinë. Deshamp e la në stol lojtari, por duke parë vështirësitë në sulm të bluve, e aktivizoi në minutën e 68. Ajo që vjen pas, me atë gjuajtje me kokë i vetëm në zonë në minutën e 90, i hapi rrugë një historie të shkëlqyer për sulmuesin francez, ndërsa ndryshoi atë që mund të ishte një verë edhe më e bukur për përfaqësuesen shqiptare. /vipsport.al/
