Pas lajmit për hapjen e kufijve të shteteve të BE-së një numër i konsiderueshëm qytetarësh shqiptarë i janë drejtuar Pikës Kufitare të Kakavijës për të kaluar drejt Greqisë. Udhëtarët shqiptarë të pajisur me dokumentacionin përkatës : PLF, PCR test apo dhe me certifikatën e vaksinimit kanë pritur në radhë të gjata, për shkak të mungesës së sporteleve të palës greke.
Kjo e fundit, ndonëse punon me ritme të ulëta, po ushtron kontroll të rreptë tek qytetarët në bazë të protokolleve të sigurisë.
Për shkak të radhës dhe dyndjes në palën greke, drejtuesit e Policisë Shqiptare të Kakavijës, kanë kërkuar shpjegime nga homologët grekë, për rrjedhojë fqinjët kanë shtuar edhe një sportel pak më parë.
Mësohet se deri në këto momente kanë kaluar në drejtim të Greqisë 832 persona, ndërsa limiti ditor është 1500.
