Italia është kualifikuar në çerekfinalet e Euro 2020 në mënyrën e saj, mes vuajtjesh, duke bërë të harrohen shpejt fitoret e thjeshta të fazës në grupe. Përballë Austrisë, skuadrës së Mançinit i janë dashur shtesat dhe VAR që të siguronin një biletë mes katër ekipeve më të mira të turneut, duke fituar 2-1.
Italianët dominuan pjesën e parë, duke krijuar disa mundësi para portës kundërshtare, por pa arritur të gjenin rrjetën, të ndalur edhe nga shtylla e cila i mohoi Imobiles festën e golit. Por në të dytën, me kalimin e minutave loja e austriakëve u bë më ofensive dhe po të mos ishte për VAR-in, Italia mund t’i kishte dhënë lamtumirën turneut. Fillimisht teknologjia solli anulimin e një goli të Arnautoviç për pozicion jashtë loje, e pastaj, po për pozicion jashtë loje, u hoqi austriakëve mundësinë e një penalltie pas ndërhyrjes së Pesina.
Kështu, 90 minutat u mbyllën pa gola dhe dy skuadrat iu drejtuan kohëve shtesë, ku diferencën e bënë individualitetet italiane. Kieza tregoi se nuk është rastësi pse te Juventusi i kanë dhënë një rol të rëndësishëm, duke shënuar me një lëvizje klasi golin e 1-0. Ndërsa pak çaste më vonë, Pesina dyfishoi shifrat.
Por nuk mbaroi me kaq, pasi Austria shënoi me Kalajxhiç dhe bëri që italianët të mbronin me forca të shumta në minutat e fundit të shtesave, për të mbyllur sfidën mes ankthit, por duke marrë në fund një fitore që i preu biletën për në çerekfinalet e turneut. /Vip sport
