Lionel Messi nuk është më një futbollist i Barcelonës. Që nga mesnata e të mërkurës, kontrata e tij me klubin katalanas ka përfunduar dhe lojtari është i lirë të zgjedhë të ardhmen e tij në çdo klub tjetër pa asnjë pengesë. Sigurisht, të gjitha rrugët të çojnë drejt një rinovimi me katalanasit me planin e ri 10-vjeçar që i është afruar, por klubi për momentin do të vuajë pasojat e përfundimit të kontratës derisa të hidhet e zeza mbi të bardhë.
Si në Barcelonë, ashtu edhe Argjentinë, janë të bindur se Messi do të rinovojë, por është e qartë për të gjithë se ai nuk do asnjë lloj shpërqendrimi gjatë pjesëmarrjes së tij në Kupën e Amerikës, meqë i ka vënë objektiv vetes t’i shkojë deri në fund atij turneu që e kërkon me shumë ngulm. Kështu, firma do të presë të paktën edhe dy javë, me pasoja jo të parëndësishme për katalanasit.
Nga ky moment, për ta nuk është e lejuar që të reklamojnë asgjë me imazhin e Messi-t apo të lidhur me emrin e tij. Klubi nuk lejohet më të shesë fanella të lojtarit e kjo ka sigurisht një kosto financiare. Përtej kësaj, nëse lojtari dëmtohet gjatë Kupës së Amerikës, klubi nuk do të përfitojë dëmshpërblim nga FIFA siç po ndodh me rastin e Dembele. Gjithashtu, edhe lëvizjet e tjera në merkato janë bllokuar për shkak të rij dhe të kostos së operacionit për firmën, pasi duhen lëvruar fonde të rëndësishme.
Por në Katalonjë janë të gatshëm të presin dhe të sakrifikojnë për firmën e tij, pasi e dinë se largimi i Mesit do t’i sillte klubit një dëm të pariparueshëm imazhi në një moment kritik, ku gjërat duhet të shkojnë në mënyrë perfekte për të kthyer klubin në shinat e duhura.
