Dita e rënies së Myslym Shyrit – 8 korrik 1944.
Lindi në Tiranë, në vitin 1916. Ideali i lirisë, si tek shumë të rinj të asaj kohe, ishte mbruajtur thellë tek ai, gjë për të cilin luftoi fort. Që në krijimin e njësiteve guerile të Tiranës, spikati për guximin që tregonte, duke marrë përsipër dhe kryer aksione me shumë rrezikshmëri, që bëri të jetë në shënjestër të autoriteteve fashiste të pushtimit. Për këtë arsye, kalon partizan në Çetën e Pezës, në vitin 1942. Mars 1943, ngarkohet me detyrën e komisarit të Çetës së Dumresë dhe më vonë komisar i Batalionit të Dytë, Brigada e Parë Sulmuese. Me këtë detyrë i priu formacionit të tij, në një luftim të ashpër në Fushë Alije të Dibrës, ku dhe bie në fushën e betejës, në 8 korrik 1944, vetëm 27 vjeç.
Në vitin 1969, Byroja Politike e Komitetit Qendror te Partisë së Punës vendosi t’i propozonte Presidiumit të Kuvendit Popullor të Republikës që me rastin e 25-vjetorit të çlirimit të Atdheut dhe fitores së revolucionit popullor, për merita të shquara patriotike dhe revolucionare ndaj atdheut, t’i jepet tituli i lartë “Hero Populli” Myslym Shyrit.
Ky titull iu dha pasi ai i ishte përgjigjur thirrjes së Partisë duke u bërë një luftëtar i shquar i njësitëve guerile dhe i reparteve partizane më vonë. Myslym Shyri plotësoi me devotshmëri të gjitha detyrat që ju ngarkuan. Ai u shqua si udhëheqës i formacioneve partizane dhe në përleshje me armiqtë tregoi aftësi dhe trimëri të rrallë derisa për kauzën e madhe të Partisë e të popullit dha jetën në 8 korrik 1944.
Foto: AQSH
