Majlinda Kelmendi, xhudistja që i solli medaljen e parë olimpike në histori Kosovës, ka deklaruar se pas Tokios do t’i japë fund karrierës në sportin aktiv. Kelmendi për mediat kosovare ka deklaruar se diçka të tillë donte ta bënte para Lojërave Olimpike që po mbahen aktualisht, por ka qenë trajneri Kuka ai që e ka bindur të vazhdojë.
“Unë ndoshta këtë vit kam qenë në dyshime a të largohem apo të vazhdojë, për shkak të lëndimeve. Por në momentin e fundit kam vendosur për hatër të Tonit të vazhdojë, të garojë në Lojëra Olimpike. Fatkeqësisht nuk shkoj si duhet, nuk është se nuk isha në formë, por nuk ishte dita ime. Për mua kjo ka qenë gara e fundit, nuk e kam pritur që gara e fundit në karrierë do të shkojë kështu. Ishte e shkruar, krejt i kam fituar. I kam sjellë Kosovës mjaft emocione, mjaft lot është radha e tjerëve. Do të jem afër Tonit me u mundu me nxjerrë talente tjera prej Kosovës”, ka thënë Kelmendi.
Kelmendi ka folur edhe për sukseset e Distria Krasniqit dhe Nora Gjakovës, që fituan medaljet e arta.
“Po ndjehem jashtëzakonisht mirë. Jam shumë e lumtur. Për Disin e kemi prit, duke e marrë parasysh formën gjatë vitit. Nuk jemi befasuar. Nora jo që nuk mundet, por nganjëherë është njeri që kalkulon shumë. Jam shumë e lumtur që puna e sakrifica e Tonit po shpërblehet në këtë mënyrë,”- tha Kelmendi.
Fillimisht sportistja ka garuar me flamurin e Shqipërisë në garat ndërkombëtare, por pas njohjes së Kosovës zgjodhi ‘dardanët’. Sa i përket Lojërave Olimpike që po mbahen aktualisht ajo u eliminua që në ndeshjen e parë, duke bërë një surprizë jo të këndshme, por gjithsesi karriera e saj është ëndërr për çdo sportist.
