Gjatë 24 orëve të fundit janë arrestuar 9 shoferë, nga të cilët 5 për drejtim mjeti pa leje drejtimi dhe 4 për drejtim mjeti në gjendje të dehur. Gjithashtu janë pezulluar 79 drejtimi, prej të cilëve 53 për shpejtësi mbi normat e lejuara dhe 26 për drejtim mjeti në efektin e alkoolit. Policia Rrugore njofton se janë gjobitur 1905 shoferë për shkelje që mund të shkaktonin pasoja për jetën. Gjithashtu 4 drejtues mjeti janë arrestuar për veprën penale “Korrupsioni aktiv ndaj personave që ushtrojnë funksione publike”. Në pranga kanë rënë 20-vjeçari B.K., 49 vjeçari S. Ll., 49 vjeç, 46 vjeçari A. R., dhe 20 vjeçari A. Sh,, pasi gjatë kontrolleve parandaluese të kryera nga shërbimet e Komisariatit Rajonal të Policisë Rrugore Tiranë, iu kanë ofruar para punonjësve të Policisë, me qëllim shmangien e ndëshkimit për shkeljet e kryera. Gjithashtu, bazuar në pamjet filmike të publikuara në rrjetet sociale dhe verifikimet e kryera nga ana e Policisë Rrugore, janë evidentuar dhe ndëshkuar me masë 50.000 dhe 1000.000 lekë të rinj, dy drejtues mjetesh që kryenin manovra të rrezikshme në rrugë, konkretisht: Drejtuesi i mjetit tip “Benz”, M. C., nga Durrësi, filmonte veten duke kryer manovra të rrezikshme pranë kryqëzimeve dhe duke kaluar shpejtësinë gati dyfish mbi normën e lejuar në qendrat e banuara. Ai është ndëshkuar nga Policia Rrugore e Durrësit me masë administrative 50.000 lekë të rinj. Ndërsa në aksin rrugor Fushë Krujë – Thumanë, drejtuesi i një autobusi të linjës Prishtinë-Tiranë është futur në parakalim të gabuar, duke rrezikuar jetën e pasagjerëve të autobusit dhe të përdoruesve të tjetër të rrugës. Bazuar në pamjet filmike, autobusi është ndaluar mëngjesin e sotëm nga Njësia e Policisë Rrugore për Sigurinë e Autostradës Milot-Morinë. Në momentin e ndalimit është konstatuar se drejtuesi i autobusit, H. B. nuk kishte vendosur rripin e sigurimit dhe drejtonte autobusin pa lejen përkatëse të drejtimit. Ndërkohë nga verifikimi i tahografit rezultoi se ai kishte drejtuar mjetin me shpejtësi mbi normën e lejuar. Shoferi i autobusit është ndëshkuar me masë administrative 100.000 lekë të rinj.
