Ekonomia e vendit po rimëkëmbet më shpejt sesa ishte parashikuar sipas Bankës së Shqipërisë, e ndihmuar më shumë nga rritja e aktivitetit në sektorin prodhues, në atë të shërbimeve dhe sektorin energjetik.
“Të dhëna indirekte flasin për norma më të shpejta rritjeje gjatë tremujorit të dytë. Pas recesionit të vitit të kaluar, ekonomia parashikohet të rritet relativisht shpejt gjatë vitit 2021”, thuhet në raportin e bankës.
Të gjitha këto parashikime optimiste janë bazuar në një situatë të përmirësuar të pandemisë
“Burim rreziku vijon të jetë intensifikimi i pandemisë me përhapjen e varianteve të reja të virusit apo një rimëkëmbje më e ngadaltë e konsumit, si pasojë e një përqasjeje më të kujdesshme të familjeve shqiptare”, thuhet në raport.
Ndërkohë nga ana tjetër banka thotë se punësimi ende nuk ka hyrë në shinat e rikuperimit, për këtë arsye do të vijojë mbështetja për bizneset nga bankat e nivelit të dytë, pasi do të mbahet e pandryshuar politika monetare që garanton likuiditet për bankat. Nëpërmjet këtij vendimit bizneset do të rrisin aktivitetin e tyre dhe të rrisin pagat e punonjësve.
Rritja e pagave sipas ekspertëve të bankës do të kishte një efekt zinxhir pozitiv e për pasojë do rriste në 3% inflacionin më shumë se është aktualisht, që është 2.2%.
“Rritja e pagave do të ushtrojë presion për rritjen e kostove të prodhimit dhe të çmimeve përfundimtare. Rritja e këtyre të fundit do të ndihmohet edhe nga rritja më e shpejtë e inflacionit në mjedisin e jashtëm. Në parashikimet tona, kthimi i inflacionit në objektiv pritet të ndodhë brenda vitit 2022”, vijon më tej raporti.
Ndërsa sa i takon luhatjeve në kursin e këmbimit Banka e Shqipërisë thotë se zhvlerësimi i euros ka ardhur si pasojë e efektit sezonal dhe prurjeve nga turistët.
